Таҳия ва пешбурди сохтори устувор дар тарбияи рӯҳияи соҳибкорӣ

Душанбе, 10 феврал. (АМИТ «Ховар», Покиза Маҳмадбекова). — Масъалаи таҳия ва пешбурди сохтори устувор ҷиҳати тарбияи мутахассисон дар рӯҳияи соҳибкорӣ дар заминаи стандартҳои байналмилалӣ зимни вохӯрии муовини вазири рушди иқтисод ва савдои ҷумҳурӣ Умед Давлатзод бо роҳбари лоиҳаи Комиссияи Аврупоии «Таҳия ва пешбурди сохтори устувор доир ба тарбияи рӯҳияи соҳибкорӣ дар Русия ва Тоҷикистон» Ҷозеф Афф мавриди баррасӣ қарор гирифт. Ба мухбири АМИТ «Ховар» аз Хадамоти матбуоти вазорати мазкур иттилоъ доданд, ки дар рафти мулоқот ҷонибҳо инчунин перомуни баланд бардоштани савияи кадрҳои омӯзгорӣ, омода намудани омӯзгорони бахши иқтисод ва дар синфҳои болоии муассисаҳои таҳсилоти миёнаи умумӣ роҳандозии интихоби касби дорои равияи иқтисодӣ табодули назар карданд. У. Давлатзод изҳор намуд, ки Вазорати рушди иқтисод ва савдои Тоҷикистон ҷиҳати таҳияи лоиҳаҳои муштарак дар ин самт ва татбиқи босамари онҳо бо созмонҳои байналмилалӣ, аз ҷумла Иттиҳоди Аврупо ҳамеша омода аст. Бояд қайд намуд, ки иштироки Ҷумҳурии Тоҷикистон дар лоиҳаи мазкур аз ҷониби Комиссияи махсуси Иттиҳоди Аврупо мутобиқи интихоби озмунӣ аз байни давлатҳои Осиёи Марказӣ маъқул дониста шудааст.