115 ҳазор доллар барои гурӯҳҳои таъиноти махсус

Душанбе, 20 март. (АМИТ «Ховар», Пайрав Назаров). – Маркази ҳамкории ҳарбии Сафорати ИМА дар Тоҷикистон барои гурӯҳҳои таъиноти махсуси Қӯшунҳои сарҳадии Тоҷикистон лавозимот ва таҷҳизоти инфиродӣ супурд, ки он иборат аз либоси гарм ва лавозимоти тактикӣ мебошад. Арзиши лавозимоту таҷҳизоти зикршуда беш аз 115 ҳазор доллари ИМА – ро ташкил медиҳад.Тавре аз Сафорати ИМА дар ҶТ ба АМИТ «Ховар» хабар доданд, таҷҳизоти инфиродиро беш аз 40 нафар кормандони гурӯҳҳои зудамали таъиноти махсуси Қӯшунҳои сарҳадии Тоҷикистон мавриди истифода қарор медиҳанд. Ба гуфтаи манбаъ, лавозимоту таҷҳизоти зикршуда ба саъю кӯшишҳои Ҳукумати Тоҷикистон дар мубориза бо унсурҳои ифротталаб таъсири мусбат мерасонад. Ин кӯмаки техникӣ маҳсули яке аз лоиҳаҳои аз ҷониби Сафорати ИМА дастгирӣ шудани Қувваҳои Мусаллаҳи Тоҷикистон мебошад.