Намоишгоҳи маводи иттилоотӣ

Душанбе, 27 март. (АМИТ «Ховар», Кристина Эрлих). – Бо ибтикори Созмони умумиҷаҳонии тандурустӣ (СУТ) ва дар радифи ҳамкорӣ бо Вазорати тандурустии ҶТ ва Барномаи Бунёди ҷаҳонии СММ имрӯз, 27 март, Намоишгоҳи маводи иттилоотӣ перомуни масоили бемории сил барои донишҷӯён, профессорон ва омӯзгорони Донишгоҳи давлатии тиббии Тоҷикистон ба номи Абӯалӣ ибни Сино доир мешавад.Дар ин бора намояндаи оид ба масъалаҳои равобит бо аҳли ҷамъияти Созмони умумиҷаҳонии тандурустӣ дар Тоҷикистон Таҳмина Алимамедова ба хабарнигори АМИТ «Ховар» иттилоъ дод. Ғайр аз ин, имрӯз дар «Кохи Ҷомӣ» маросими мукофотонидани ғолибони озмуни журналистон барои инъикоси беҳтарини масъалаҳои бемории сил дар ВАО баргузор мешавад. Ҳар ду чорабинӣ ба Рӯзи умумиҷаҳонии муборизаи зидди бемории сил бахшида шудаанд, ки онро ҳар сол аҳли ҷаҳон, аз ҷумла табибони Тоҷикистон ҳам 24 март таҷлил менамоянд.