Сел дар Кӯлоб хисороти ҷонӣ наовард

Душанбе, май. (АМИТ «Ховар», Дилшодаи Хайруллоҳ).-Бинобар иттилои воситаҳои ахбори омма дар паи селҳои ахир гӯё чор тан аз сокинони шаҳри Кӯлоб ҷони худро аз даст доданд. Бар асоси омори дақиқ бар асари сели рӯзҳои гузашта касе аз сокинони шаҳри Кӯлоб ба ҳалокат нарасидааст. Чор нафари фавтида усулан сокинони навоҳии Мӯъминобод ва Шӯробод мебошанд ва дар ахбори паҳнгашта дар ВАО истилоҳи минтақа ба шаҳри Кӯлоб иваз гаштааст. Дар паи офатҳои табии рӯзҳои охир 452 хона дар шаҳру деҳоти Кӯлоб зиён дидааст ва барои қисмате аз осебдидагон кӯмакҳои яквақтаина расонида мешавад. Бар асоси иттилои сардори Ситоди ҳолатҳои фавқулодаи шаҳри Кӯлоб Субҳон Усмонов кӯмаки мазкур, ки аз маводи ғизоӣ иборат аст, ба 79- оилае, ки аз ҳама бештар аз офати табиӣ зиён дидаанд, тақдим мешавад. Бояд гуфт, ки бар асари селҳои даҳ рӯзи охир 3- пул, 10 км роҳ, 109 гектар замини кишти пахта, 34 таҳхонаи иморати баландошиёна, 370 метр хатҳои обгузар ва канализатсия, 4710 метри мураббаъ заминҳои кабудизоршудаи кӯчаву хиёбонҳо, инчунин даҳҳо метр хатҳои барқ ва алоқа дар шаҳр зарар дидааст, ки маблағи ин хисорот 1646512,22 сомониро ташкил медиҳад. Дар ин бора ба мухбири АМИТ «Ховар» аз маркази матбуоти раиси шаҳри Кӯлоб иттилоъ доданд.