Афзоиши пасандозҳои шахсони ҳуқуқиву воқеӣ

Душанбе, 3 июл. (АМИТ «Ховар», Покиза Маҳмадбекова). — Нишондиҳандаҳои ташкилотҳои қарзии мамлакат дар мавриди ҷалби пасандозҳои шахсони ҳуқуқӣ ва воқеӣ, сафарбар намудани онҳо барои рушди бахшҳои истеҳсолии иқтисодиёти кишвар беҳтар гашта истодаанд.   Аз рӯи иттилои Бонки миллии Тоҷикистон бақияи пасандозҳо дар нимсолаи аввали соли 2012 нисбат ба ҳамин давраи соли гузашта 20,5 фоиз афзудааст. Таҳлили таркиби бақияи ҳаҷми пасандозҳо нишон дод, ки дар ин давра ҷалби маблағҳои шахсони воқеӣ рӯ ба афзоиш ниҳода, масалан, 39,5 фоиз ё 1 745,8 млн. сомониро пасандозҳои шахсони ҳуқуқӣ ва 60,5 фоиз ё 2 673,4 млн. сомониро пасандозҳои шахсони воқеӣ ташкил медиҳанд. Бояд гуфт, ки дар шаш моҳи соли равон фоизи миёнавазни пасандозҳо бо пули миллӣ ба миқдори 15,82 фоизи солона ва бо асъори хориҷӣ ба миқдори 13,62 фоизи солона афзудааст.