Мақсади лоиҳа — беҳтар намудани хизматрасонии тиббӣ

Душанбе, 20 июл. (АМИТ «Ховар», Мавҷуда Анварӣ). – Маркази татбиқи Лоиҳаи тандурустии иҷтимоӣ ва заминавӣ дар соҳаи тандурустӣ ду шартномаи грантӣ-маблағгузории иловагии дуввуми Лоиҳаи тандурустии иҷтимоӣ ва заминавӣ ва шартномаи иҷрои лоиҳаи «Идораи сармоягузориҳо барои таъмини ғизо дар ноҳияҳои камбизоати вилояти Хатлон»-ро татбиқ намуда истодааст.Ин иттилоъро Нурхон Ҳаётов, директори маркази мазкур зимни як нишасти хабарӣ дар Душанбе иброз дошт. Номбурда гуфт: «Мақсади асосии Лоиҳаи тандурустии ҷомеавӣ ва заминавӣ — беҳтар намудани сифат ва дастрасии хизматрасонии тиббӣ, баланд бардоштани иқтидори соҳаи тандурустӣ ва дастгирии ислоҳоти он мебошад. Маркази татбиқи лоиҳа дар раванди Созишномаи маблағгузории иловагии дуввум, ки 3 миллион доллари амрикоиро ташкил менамояд, дар 44 ноҳияи вилоятҳои Хатлон ва Суғд дастгирии ислоҳоти сохторию молиявиро давом дода, дар яке аз ноҳияи дурдасти вилояти Хатлон – ноҳияи Темурмалик барқарор ва сохтмони иншооти тиббӣ ва омӯзиши мутахассисони тибби оилавиро амалӣ намуда истодааст.