Нигоҳи нав ба сиёсати хориҷии Тоҷикистон

Душанбе, 5 июл. (АМИТ «Ховар», Раъно Нусратуллоева).- Нашриёти ватании «Контраст» китоби нави мушовири калони Сарвари давлат оид ба сиёсати хориҷӣ, номзади илмҳои фалсафа Зафар Сайидзода таҳти унвони «Таҳаввулоти муносибатҳои байнидавлатии Ҷумҳурии Тоҷикистон дар давраи ташаккули сиёсати хориҷии он» -ро нашр намуд. Рисолаи илмӣ — сиёсии мазкур аз се боб иборат буда, бори нахуст шаклхои гуногуни густариши муносибатҳои байнидавлатии Тоҷикистонро дар даҳсолаи аввали солҳои баъди соҳибистиқлолӣ мавриди таҳлили ҳамаҷонибаю маҷмӯӣ қарор медиҳад. Муаллиф кӯшиш намудааст, ки ба сиёсати хориҷии бисёрсамтаи «дарҳои боз»-и Тоҷикистон тавассути баррасии авзалиятҳои геополитикӣ, ҳарбӣ ва тиҷоратӣ — иқтисодии давлати соҳибихтиёр баҳои амиқу ҷадид диҳад. Хонандагон имкон доранд аз китоби мазкур матолиби заруриро доир ба таърих, вазъ ва хусусияти муносибатҳои байнидавлатии Тоҷикистон бо Русия, Чин, Эрон, инчунин кишварҳои Осиёи Марказӣ ва давлатҳои Ғарб ба даст оранд.Асари мазкур аз 568 саҳифа иборат буда, барои доираи васеи донишҷӯён, магистрантҳо, аспирантҳо, устодони мактабҳои олӣ ва дигар гурӯҳи хонандагон, ки ба сиёсати хориҷии муосири Ҷумҳурии Тоҷикистон таваҷҷӯҳ доранд, тавсия дода мешавад.