Проблемаҳои такмили қонунгузории бонкӣ ва дигар ташкилотҳои молиявӣ

Душанбе, 13 июл. (АМИТ «Ховар», Фотима Қуватова).-Бо ташаббуси Маркази миллии қонунгузории назди Президенти Ҷумҳурии Тоҷикистон тибқи қарори Ҳукумати Ҷумҳурии Тоҷикистон ва Нақшаи корӣ барои солҳои 2011-2012 мизи мудаввар дар мавзӯи «Проблемаҳои такмили қонунгузории бонкӣ ва дигар ташкилотҳои молиявӣ» бо иштироки намояндагони бонкҳо ва ташкилотҳои молявӣ баргузор гардид. Қайд гардид, ки ҷараёни инкишофи муносибатҳои ҷамъиятӣ дар соҳаи бонкдорӣ зарурияти таҳлили қонунгузории бонкиро дар шароити ҳозира тақозо менамояд. Ин раванд бояд бо назардошти такмили қонунгузории Ҷумҳурии Тоҷикистон дар соҳаи гражданӣ ва соҳибкорӣ, ки бояд такмил дода шавад ба роҳ монда мешавад. Дар вақтҳои охир якчанд қонунҳо дар соҳаи бонкӣ қабул карда шуданд, ки аз лиҳози мазмуни истилоҳоти ҳуқуқӣ коста буда боиси номуайянӣ дар истифода ва таҷрибаи амалияи ҳуқуқӣ гардидаанд. Аз ин ҷо минбаъд инкишофи қонунгузории бонкӣ бо назардошти Барномаи татбиқи Консепсияи инкишофи қонунгузории ҶТ дар соҳаи молия, андоз ва фаолияти бонкӣ аз 3 апрели соли 2012 ба роҳ монда шавад.