Сафари хизматии Вазири корҳои дохилӣ ба ВМКБ

Душанбе, 11 июл. (АМИТ «Ховар», Лутфия Эшонкулова).-Сафари хизматии Вазири корҳои дохилии Ҷумҳурии Тоҷикистон генерал-лейтенанти милитсия Рамазон Раҳимов ба Вилояти Мухтори Кӯҳистони Бадахшон идома дорад.Ба иттилои сомонаи расмии Вазорати корҳои дохилии ҶТ, зимни ин сафар Вазири корҳои дохилӣ аз шароити корӣ, омодабошии ҳайати шахсӣ ва натиҷаҳои хизматии Раёсат ва шӯъбаҳои Вазорати корҳои дохилӣ дар вилояти мазкур дидан намуда, барои бартараф намудани камбудиҳои ҷойдошта ва боз ҳам баланд намудани натиҷаҳои хизматии ҳайати шахсӣ, ошкор ва пешгирии содиршавии ҷиноятҳои вазнин, пешгирии воридот ва интиқоли ғайриқонунии маводи нашъадор ва яроқу лавозимоти ҷангӣ дастуру супоришҳои мушаххас дод.Инчунин Вазири корҳои дохилӣ бо роҳбарони як қатор сохторҳои қудратии мамлакат аз рафти машқҳои муштараки тактикии мақомоти ҳифзи ҳуқуқ ва сохторҳои қудратӣ дар вилояти мазкур дар мавзӯи «Мубориза бар зидди терроризм ва муомилоти ғайриқонунии маводи нашъадор» дидан намуда, ба маҳорати кормандон ва мутахассисони бахшҳои гуногуни мақомоти корҳои дохилӣ, ки дар ин машқҳо иштирок доштанд, баҳои баланд дод ва зиёда аз 15 нафар кормандонеро, ки дар ин машқҳо аз худ маҳорати баланди касбӣ нишон доданд, бо медал, нишони сарисинагӣ ва тӯҳфаҳои хотиравӣ қадрдонӣ намуд.