Сафи идона

Суғд, 6 июл. (АМИТ «Ховар»,  С.Юсуфӣ). –   Дар  факултети №4 – и Академияи  ВКД  Ҷумҳурии  Тоҷикистон имрӯз хатми  курсантони  гурӯҳи  қӯшунҳои  дохилӣ,  ки дар   муддати  ду  сол  таҳсил  намудаанд,  гузаронида  шуд. Бояд  мутаззаккир   шуд, ки  факултети  №4 – и Академияи  ВКД  Ҷумҳурии Тоҷикистон аз  августи  соли  1994  дар  омода  намудани  кормандони  мақомоти  корҳои   дохилии  кишвар  саҳми  беандоза  гузошта  истодааст. Ин  боргоҳи  таълим  аввал  дар  заминаи Мактаби олии ВКД ҶТ,  баъдан  дар  моҳи   декабри соли 2000  ба  факултети №4 – и Академияи  ВКД  ҶТ  табдил  дода шуда,   барои  давлати  соҳибистиқлоламон то имрӯз қариб  2500 нафар  мутахассиси баландихтисос  ва  миёна  омода намудааст.
 Аз  соли 2000  мувофиқи  талаботи ВКД ҶТ   факултети  №4 нозирони  минтақавӣ ва  кормандони  оперативиро  омода  мекард, аз  соли  2010  бошад,  барои  ВКД ҶТ  мутахассисони  олӣ   дар  соҳаи  фаъолияти  маъмуриро  бар  ӯҳда  гирифтааст,  ки  ҳоло   вобаста ба  ин  самт  курсантон  дар  курси дуюм таҳсил  карда  истодаанд.
 
Дар  факултет 8  кафедра фаъолият  менамояд, ки  мутахассисони  баландихтисос дар таълиму  тарбияи ҷавонон  саҳми  беандоза  гузошта   истодаанд. Дар  байни  онҳо  кормандони  собиқадори  мақомоти  ҳифзи ҳуқуқ ва  ҳам   олимон  кор  мебаранд. Дар  факултет ҳоло  15  нафар  докторону  профессорон ва номзадҳои  илм  фаъолият  доранд.
 То имрӯз  фақат  дар  кафедраи  Тайёрии  ибтидоӣ  ва такмили  ихтисос  зиёда аз 2000  нафар  кормандони  ВКД  дар  вилояти  Суғд аз  курсҳои тайёрии  ибтидоӣ ва такмили  ихтисос   гузаштаанд.
 Мувофиқи  нишондоди  ВКД ҶТ  таҳсил  дар  Академия  чорсола  буда,  аз  соли   равон  ба таҳсили 5  сола  довталабон қабул  карда  мешаванд.