Эмомалӣ Раҳмон: «Ҳамкорӣ бо мутахассисони чиноӣ ба мо фоида меорад»

Душанбе, 4 август. (АМИТ «Ховар», Дилшодаи Хайруллоҳ).- Тавре маълум аст, ноҳияи Ёвон яке аз минтақаҳои аграрии мамлакат ба шумор меравад, аз ин хотир потенсиали кишоварзии ин ноҳия дар сатҳи вилояти Хатлон қобили таваҷҷӯҳ буда, барзгарон дар ин минтақа ҷиҳати истифодаи оқилонаи замин аз имконоти мавҷуда самаранок истифода мебаранд. Бо назардошти ин Президенти мамлакат Эмомалӣ Раҳмон дар доираи сафари кории худ ба ин ноҳия аз фаъолияти якчанд хоҷагиҳои деҳконӣ ошноӣ пайдо кард. Боздиди Сарвари Давлат дар Хоҷагии деҳқонии «Абдураҳмонҷон» аз шиносоӣ бо нашъу намои пахта оғоз ёфт. Тавре зикр гардид, Хоҷагии мазкур аз 106 га замини обӣ иборат буда, аз соли 2003 фаъолият мекунад.Хоҷагидорон дар майдонҳои дар ихтиёраш буда соли ҷорӣ дар масоҳати 60 га пахта, 20 га гандум, 10 га юнучқа ва 5 га полезиҳо кишт намуда, дар майдони 7 га боғ бунёд кардаанд. Кишти такрорӣ бошад, 5 гектарро ташкил мекунад. Иттилоъ дода шуд, ки ҷиҳати ҳавасмандгардонии ҳамаи 60 саҳмдор аз ҳисоби заминҳои коркардшудаи дар ихтиёрашон буда, 5 сотиқӣ ва инчунин ба тарзи кофӣ бобати захираи хӯроки чорво мусоидат карда мешавад. Сарвари давлат бори дигар перомуни моҳияти захира намудани маҳсулоти озуқаворӣ ва ҳам хӯроки чорво барои 2 соли оянда бо хоҷагидорон сӯҳбат ороста, ба масъулони бахши аграрӣ бобати истифодаи тухмиҳои серҳосил ва ба шароити маҳал мувофиқ дастуру супоришҳо дод.Хотиррасон мекунем, ки алъон дар Тоҷикистон ҷиҳати табодули таҷриба дар бахши кишоварзӣ як ҳайати мутахассисони Ҷумҳурии мардумии Чин фаъолият мекунанд. Эмомалӣ Раҳмон иброз намуд, ки мақсад аз ҷалби мутахассисони чиноӣ пеш бурдани соҳаи кишоварзӣ дар кишвар ва ба ин васила расидан ба яке аз ҳадафҳои муҳими стратегиамон – таъмини амнияти озуқавории мамлакат мебошад. Эмомалӣ Раҳмон таъкид намуд, ки сармоягузорони чиноӣ дар он заминҳое фаъолият доранд, ки шӯразада ва аз гардиши кишоварзӣ берун мондаанд. «Онҳо технологияи нав ворид мекунанд, таҷрибаи пешқадамро тарғиб ва ҳамкориро бо ҳамтоёни тоҷики худ таҳким мебахшанд»- иброз дошт Сарвари Давлат. Эмомалӣ Раҳмон ба олимони соҳаи кишоварзии Ҷумҳурии мардумии Чин супориш дод, ки дар доираи шартномаи ҳамкории Тоҷикистону Чин дар соҳаи кишоварзӣ дар Тоҷикистон бо мақсади истеҳсоли тухмиҳои хушсифат се маркази машваратии омӯзишӣ ифтитоҳ кунанд, то он мавзеи табодули таҷриба миёни олимони ҳар ду кишвар гардад. Дар асоси қарордоди дутарафа ба мӯҳлати 49 сол аз ҳисоби заминҳои ҷамоатҳои деҳоти ба номи Г. Юсуфова ва Даҳана бо мақсади ворид намудани технологияи нав дар соҳаи кишоварзӣ ва тухмии аълосифат, дар ҳаҷми 295 га замини обӣ ҷудо гардидааст. То ба имрӯз дар қитъаҳои мазкур 30 га пахта, 180 га ҷуворимакка, 15 га гандум, 1 га чормағзи заминӣ, 1 га сабзавот ва 57 га дигар зироатҳои лубиёгӣ кишт намудаанд.Ба гуфтаи Эмомалӣ Раҳмон феълан дар мамлакат беш аз 1200 га майдони ғаллазор мавҷуд мебошад, ки дар сурати саъйи бештар ба харҷ додану муваффак гардидан ва гирифтани 50 сентнер ғалла аз ҳар гектар, дар натиҷа 1млн 200 ҳазор тонна ғалладона ба даст хоҳад омад, ки ин кафолати таъмини 80 фоизи мардуми Тоҷикистон бо озуқа мебошад. Эмомалӣ Раҳмон гуфт, ин тадбирҳоро маҳз дар натиҷаи тақвияти ҳамкориҳо миёни олимони тоҷику чиноӣ метавон амалӣ кард. Бо мақсади коркарди заминҳо 9 трактори гуногунтамға, 2 комбайн, 2 булдозер, 1 экскватор, 6 адад фрезер, 50 адад плуг, 5 адад тухмипошак ворид гардидааст.