Зойирин, омодаед ?

Душанбе, 1 август. (АМИТ «Ховар», Дилшодаи Хайруллоҳ). — Имрӯз дар Кумитаи корҳои дини назди Ҳукумати Ҷумҳурии Тоҷикистон мулоқоти раиси Кумита Абдураҳим Холиқов бо роҳбаладони мавсими Ҳаҷ —2012 баргузор гардид. Дар ҷараёни он масъалаҳои марбут ба омода намудани зойирини тоҷик барои ҳаҷ, риояи фарҳанги исломӣ дар Хонаи Худо, дар сатҳи баланд хидмат расонидан ба зойирини тоҷик ва дигар масоили вобаста ба фаъолияти роҳбаладон мавриди баррасӣ қарор гирифт. Раиси Кумита аз роҳбаладон тақозо намуд, ки барои хидмат расонидан ба зойирин кӯшиши худро дареғ надоранд. Тибқи барномаи Кумитаи корҳои дини назди Ҳукумати Ҷумҳурии Тоҷикистон ҳар як роҳбалад бояд тӯли ду моҳ бо гурӯҳи зойирине, ки онро роҳбаладӣ мекунад, дарсҳои тайёриро ба анҷом расонад. Дар сурати анҷом надодани ӯҳдадориҳои худ роҳбалад метавонад аз рӯйхати роҳбаладон соқит гардад. Бояд зикр намуд , ки имсол беш аз 10 нафар роҳбаладони соли гузашта бе супоридани имтиҳон ба рӯйхати роҳбаладон ворид гардиданд. Имсол барои зойирини тоҷик 2 ҷуфт либос аз матоъи пахта, 2 ҷомадон, пойафзол, ва ғайра ҷудо гардид.