Боздошти собиқ нозири шӯъбаи иҷтимоии ноҳияи Сино

Душанбе, 5 сентябр. (АМИТ «Ховар» Сарвинози Рӯҳуллоҳ). – Вазорати корҳои дохилии кишвар хабар медиҳад, ки Анварбек Юсуфбеков, собиқ нозири шӯъбаи ҳифзи иҷтимоии аҳолии ноҳияи Сино ҳамчун гумонбар дар қаллобӣ боздошт шудааст. Ба иттилои манбаъ, А. Юсуфбеков сокини 52-солаи кӯчаи Ломоносови пойтахт буда, ӯ бо роҳи қаллобӣ тасарруф кардани амволи давлатӣ ва ба даст овардани фоидаи муфт дар сохтакории ҳуҷҷатҳо мусоидат намуда, маълумотномаи ҷумҳуриявии комиссияи санҷиши тиббиро аз моҳи июли соли 2000 қалбакӣ тартиб додааст. Вай дар асоси он ба шаҳрванди 61-сола Исломиддин Асоев сокини кӯчаи Ҷ.Расулов, мудири анбори «Тоҷикгидромантаж» нафақаи маъюби гурӯҳи 2-юм таъин кардааст ва дар натиҷаи пардохти нафақаи маъюбӣ аз фонди нафақа ба давлат 154000 сомонӣ зарар расонидааст. Аз рӯи ин ҳодиса парвандаи ҷиноӣ оғоз гардида, тафтиш идома дорад.