Нархи ангишт ва дастрасии он ба харидорон

Суғд, 22 сентябр. (АМИТ «Ховар», Мирзалӣ Амонов).- Истихроҷу истеҳсоли ангишт нисбат ба соли гузашта дар конҳои ангишти ҳудуди вилояти Суғд зиёд шудааст. Аммо дар шаҳру ноҳияҳои вилоят 1 килограмм ангишт аз 1 сомонӣ то 1 сомонию 45 дирам фурӯхта мешавад. Масалан, бо ворид намудани таҷҳизоти нав, истифодаи иқтидорҳои 2 кон, истихроҷ ва истеҳсоли ангишт то имрӯз дар кони «Ангишт»-и Шӯроб ба 28 ҳазору 500 тонна расидааст, ки ин нисбат ба ҳамин давраи соли гузашта 6 ҳазор тонна зиёд аст. Аз ин рӯ, табиист, ки ҳаҷми пешниҳоди ангишт ба аҳолӣ зиёд бошаду нарх набояд боло равад. Дар ҷамъияти саҳҳомии шакли кушодаи «Ангишт»-и Шӯроб, як кило ангишт вобаста ба навъ аз 28 то 46 дирам фурӯхта мешавад. Дар чунин ҳолат бо нархҳои 1 сомонию 20 дирам ё 1 сомонию 40 дирам фурӯхта шудани ангишт дар шаҳру ноҳияҳои наздик ба кони «Ангишт»-и Шӯроб беасос мебошад. Соҳибкороне, ки ба таъминоту фурӯши ангишт машғуланд, дидаю дониста бо ин амали худ ба мардум дар хариду захираи ангишт мушкилоту муамморо пеш меоваранд.