Шаҳрдорӣ ба соҳибкорони олмонӣ чӣ гуфт?

Душанбе, 7 сентябр. (АМИТ «Ховар», Мавҷуда Анварӣ). — Имрӯз Раиси шаҳри Душанбе Маҳмадсаид Убайдуллоев ҳайати соҳибкорони Ҷумҳурии Федералии Олмонро таҳти раёсати директори генералии Кумитаи шарқии иқтисодиёти Олмон Линдер Райнер, ки дар ин зимн Сафири Фавқулодда ва Мухтори Ҷумҳурии Тоҷикистон дар Ҷумҳурии Федералии Олмон Имомуддин Сатторов ҳайатро ҳамроҳӣ мекард, бо хоҳиши онҳо ба ҳузур пазируфт. Зимни мулоқот ҷонибҳо масоили истифодаи имкониятҳои мавҷудаи тарафҳоро барои ҷалби иқтидори субъектҳои соҳибкории Олмон дар татбиқи барномаҳои шаҳрӣ, пеш аз ҳама дар соҳаҳои хадамоти коммуналӣ, воридсозии таҷҳизоту технологияҳои муосири саноативу барқӣ, рушди инфрасохторӣ ва гуманитарӣ баррасӣ намуданд. Маҳмадсаид Убайдуллоев аз таваҷҷўҳи субъектҳои соҳибкории Олмон барои роҳандозии ҳамкориҳои мутақобилан судманд изҳори сипос намуда, таъкид сохт, ки феълан дар доираи лоиҳаҳои сармоягузории дар бахши обрасонӣ ва идораи партовҳои сахти маишӣ, ки дар шаҳри Душанбе амалӣ мешаванд, ширкатҳои олмонӣ дар асоси ғолибият дар тендерҳо фаъолият доранд. Онҳо низ имкон доранд, тибқи талаботи қонунгузории кишвар бевосита дар тендерҳои эълоннамудаи шаҳрдорӣ ширкат варзида, дар татбиқи иқтидорашон муваффақ гарданд. Мулоқот дар фазои ҳусни тафоҳум ва созанда анҷом пазируфт.