Таъмини оби нӯшокӣ беҳтар шуд

Душанбе, 12 сентябр. (АМИТ «Ховар», Лаззат Диловарзод).- Бо кӯмаку дастгирии Ҳукумати Ҷумҳурии Тоҷикистон, бо мақсади барқарорсозии системаи обтаъминкунӣ ва канализатсияи шаҳру ноҳияҳои ҷумҳурӣ, Корхонаи воҳиди давлатӣ (КВД)-и «Хоҷагии манзилию коммуналӣ» бо Бонки Таҷдид ва Рушд Аврупо, Бонки Ҷаҳонӣ, ташкилоти «JAKA»-и Раёсати Ҷопон оид ба ҳамкорӣ, Ассотсиатсияи «ОXFAM»-и Британияи Кабир, Лоиҳаи «Ташаббуси Рушди Маҳал»-и «USAID»-и ИМА ҳамкориҳои судмандро ба роҳ мондааст.Дар давоми 8 моҳи соли ҷорӣ, дар доираи татбиқи лоиҳаҳои амалкунанда, корҳои зиёд анҷом дода шудаанд. Аз ҷумла, лоиҳаи рушди инфрасохтори маҳаллӣ (коммуналӣ) дар ҶТ дар арафаи анҷомёбӣ қарор дорад, ки аз тарафи Бонки Ҷаҳонӣ дар доираи 16 млн. 500 ҳазор доллари ИМА маблағгузорӣ шудааст. Дар ҷараёни татбиқи лоиҳаи мазкур барои 8 шаҳру ноҳияи ҷумҳурӣ, аз қабили шаҳрҳои Қӯрғонтеппа, Кӯлоб, Конибодом, Истаравшан, Ваҳдат, ноҳияҳои Данғара, Восеъ ва Рашт ба маблағи 17 млн. 415 ҳазор доллари амрикоӣ 41 адад мошину таҷҳизоти махсуси коммуналӣ ва 900 адад қуттии партовгирӣ харид карда шудааст, ки он 96,12 фоизи маблағи умумии лоиҳавиро ташкил дод.Дар натиҷаи татбиқи ин лоиҳа ҳолати санитарии шаҳру навоҳии мазкур беҳ гардида, таъмини истифодабарандагон бо оби нӯшокӣ дар ин манотиқ рӯ ба беҳбудӣ овардааст.