Бунёди хобгоҳи донишҷӯён оғоз гардид

Хоруғ, 19 октябр. (АМИТ «Ховар», Л.Додо ). – Президенти кишвар зимни сафари худ ба Бадахшон нахустхишти бинои хобгоҳи дуюми донишҷӯёни Донишгоҳи давлатии ба номи Моёншоҳ Назаршоевро гузошт. Аз он рӯз муддати хеле кӯтоҳ гузашта бошад ҳам, дар шаҳри Хоруғ бунёди бинои дуюми хобгоҳи донишҷӯён босуръат идома дорад. Ба гуфти сармуҳандиси сохтмон Садриддин Муддинов, хобгоҳ барои 240 нафар бунёд мегардад. Ҳоло зербинои он гузошта шудааст. Хобгоҳи аввал дар арафаи ҷашни 13 – умин солгарди Ваҳдати миллӣ бо маблағи 8 миллион сомонӣ мавриди истифода қарор гирифт. Дар он асосан донишҷӯёни оилаҳои камбизоат, инчунин аз навоҳии дурдасти Мурғоб, Ванҷу Дарвоз ва водии Вахони ноҳияи Ишкошим ҷой дода шуданд. Дар маҷмӯъ дар ин ҷо 5 бинои хобгоҳ барои беш аз 1000 нафар донишҷӯ бунёд мегардад.