Маркази замонавӣ дар Хоруғ

Хоруғ, 19 октябр. (АМИТ «Ховар», Л.Додо ). – Ибтидои ҳафтаи ҷорӣ мақомоти маҳаллии ҳокимияти давлатии ВМКБ дар ҳамбастагӣ бо Бунёди Оғохон дастгоҳҳоро барои Маркази ташхис вориди шаҳри Хоруғ гардониданд. Муовини сардори Раёсати тандурустии ВМКБ Нуралӣ Додалиев иттилоъ дод, ки шуъбаи бемориҳои чашму гӯшу гулӯи назди беморхонаи вилоятӣ ба бинои нав гузашта, бинои барҳавои он ба ихтиёри Маркази ташхис вогузор шуд ва ин ҷо аллакай дастгоҳҳои ҷадиди рентгенӣ ва ултрасадо васл шудаанд. Рӯзҳои наздик компютери томографӣ низ васл мешавад ва озмоишгоҳи ташхиси хуну пешоб бо ҷадидтарин дастгоҳҳои замонавӣ кушода мешавад. Нуралӣ Додалиев иттилоъ дод, ки дар шаҳри Хоруғ рӯи кор омадани Маркази ташхисӣ дар ҳаёти мардуми Бадахшон воқеаи хуш аст, зеро қаблан маризон ба хотири ташхиси беморӣ роҳи дарози шаҳри Душанберо пеш мегирифтанд.