Пешгирии бемориҳои ғайрисироятӣ

Душанбе, 1 октябр. (АМИТ «Ховар», Ибодат Давлатова). – Дирӯз дар шаҳри Душанбе ҷаласаи нахустини гурўҳи кории коршиносони Шўрои тандурустӣ дар назди Кумитаи ҳамгироии Иттиҳоди иқтисодии АвруОсиё дар мавзӯи «Оид ба ҳамгироии чорабиниҳо дар бобати назорат ва пешгирии бемориҳои ғайрисироятӣ» баргузор гардид.  Тавре ки ба АМИТ «Ховар» аз Вазорати тандурустии Ҷумҳурии Тоҷикистон иттилоъ доданд, ин ҷаласа бо мақсади муайян намудани дурнамои рушди «Стратегияи пешгирӣ ва табобати бемориҳои ғайрисироятӣ дар минтақаи АвруОсиё» сурат гирифт. Дар он меҳмонон аз ҷумҳуриҳои Беларус, Қазоқистон, Қирғизистон ва Федератсияи Русия даъват шудаанд. Ин ҷаласаи нахустини гурӯҳи корӣ буда, дар ҷамъомад мубодилаи афкори судманд дар бобати пешгирии бемориҳои ғайрисироятӣ, кор бо ҷавонону наврасон, ташаккули тарзи ҳаёти солим, кор бо кормандони васоити ахбори омма сурат гирифт. Хотиррасон бояд кард, ки масъалаи пешгирӣ ва табобати бемориҳои ғайрисироятӣ дар минтақа бо пешниҳоди Ҷумҳурии Тоҷикистон қабул шуда, мавриди муҳокима қарор мегирад. Дар оянда дар назар аст, ки Созишнома байни давлатҳои аъзои АвруОсиё оид ба ҳамкориҳо дар соҳаи пешгирӣ ва табобати бемориҳои ғайрисироятӣ ба имзо расад, гуфт манбаъ.