Пешниҳоди хизматрасонии дурусти бонкӣ

Шӯрообод, 16 октябр. (АМИТ «Ховар», С. Холов).- Дар ноҳияи Шӯрообод ду сол боз филиали ҶСК «Тоҷиксодиротбонк» фаъолият дошта, ба шаҳрвандон барои гирифтани маблағҳои интиқолӣ, музди меҳнат ва нафақа аз тариқи корти пластикӣ хизмат мерасонад. Қиматшо Содиқов, директори филиали мазкур гуфт, ки аксари шаҳрвандони ташкилоту муассиса, соҳаҳои фарҳанг, тибб, маориф ва дигар табақаҳои ҷамъиятӣ бо бонк барои гирифтани қарзҳои имтиёзнок ҳамкорӣ дошта, сари вақт маблағҳои заруриро дастрас менамоянд. Инчунин зикр кард, ки дар ноҳия беш аз 2000 шаҳрванд ба воситаи кортҳои пластикӣ аз банкомат маблағҳои худро бемамониат дастрас менамоянд. Ба гуфтаи манбаъ, дар ҷамоатҳои Даштиҷум ва Саричашма аз сабаби дур будани роҳ аз маркази ноҳия марказҳои хизматрасонии бонкӣ таъсис дода шуда, дар оянда низ кушодани чунин марказ дар ду ҷамоат роҳандозӣ мешавад. Дар айни ҳол барои гирифтани маблағи қарзӣ 500 нафар мизоҷ ба филиал муроҷиат карданд, ки ба онҳо бо 2,5%-и солона ба муҳлати як сол маблағҳои зарурӣ дода шуданд.