Семинар бахшида ба бемориҳои сирояткунандаи ҳайвонот

Душанбе, 29 октябр. (АМИТ «Ховар», Дилшодаи Хайруллоҳ)- Бемории сирояткунандаи ҳайвонот (брутселлёз)- ин бемории сироятии байни чорвою инсон аст, ки пешгирии он ҳадафи асосии давлату ҳукумат мебошад. Бо ин мақсад дар ҷамоати шаҳраки Оби Гарм оид ба пешгирӣ ва мубориза бар зидди бемории сироятии чорвою инсон семинар баргузор гардид. Дар он намояндагони ҷамоатҳои шаҳраку деҳот, кормандони шуъбаи кишоварзии шаҳр, мутахассисони идораи байторӣ, эпизоотологии шуъбаи озуқа ва кишоварзии Ташкилоти Давлатҳои Муттаҳида Кароматулло Ҳамроев ва сардори шуъбаи зиддиэпизоотии Хадамоти назорати давлатии байтории Вазорати кишоварзии Ҷумҳурии Тоҷикистон Рустам Резвонов иштирок доштанд.Дар семинар моҳияти «Барномаи мақсадноки давлатии зиддиэпизоотӣ» мавриди баррасӣ қарор гирифт. Мақсад аз баргузории семинар-пешгирии бемории сироятии ҳайвон ба инсон дар байни аҳолии шаҳр мебошад. Тавре ки дар семинар зикр шуд ин бемории сироятиест, ки аз чорво ба инсон мегузарад. Барангезандаи он микробҳо мебошанд, ки аз сабаби риоя накардани қоидаҳои эпидемиологию байторӣ ба одамон гузашта, ба бемориҳои буғумдард, безурётӣ ва дигар бемориҳои хатарнок оварда мерасонанд. Дар шаҳри Роғун низ гирифторони ин беморӣ ба қайд гирифта шудаанд.Дар ин бора ба мухбири АМИТ «Ховар» Осиямоҳ Давлатова, мутахассиси шуъбаи рушди иҷтимоӣ ва робита бо ҷомеаи дастгоҳи раиси шаҳри Роғун иттилоъ дод.