Таҷлили Рӯзи забон дар вазорати энергетика ва саноат

Душанбе, 3 октябр. (АМИТ «Ховар», Дилшодаи Хайруллоҳ)- 2 октябри соли равон дар Вазорати энергетика ва саноати Ҷумҳурии Тоҷикистон ба муносибати Рӯзи забони давлатӣ ҷамъомад баргузор гардид.Раиси Комиссияи татбиқи Қонуни Ҷумҳурии Тоҷикистон «Дар бораи забони давлатӣ»-и ин вазорат, муовини вазир Хайрулло Маҳмадуллоев ҳозиринро бо Рӯзи забони давлатӣ табрик намуда, гуфт: «чанде қабл мо 21-солагии Истиқлолияти давлатиро бо тантана ҷашн гирифтем, ки Рӯзи забони давлатӣ ҳам яке аз самараҳои давраи истиқлолият аст». Вай роҷеъ ба моҳияти забони давлатӣ, саҳми донишмандони тоҷик дар ғанӣ гардонидани фарҳанги ҷаҳонӣ, раванди татбиқи Қонуни Ҷумҳурии Тоҷикистон «Дар бораи забони давлатӣ» дар вазорат, корхонаву муассисаҳо ибрози назар кард.Дар ҷамъомад инчунин намояндагони соҳаҳои гуногун оид ба татбиқи қонуни забон дар корхонаҳои зертобеи вазорат сухан ронда, андешаҳои худро баён доштанд.