Ислоҳоти соҳаи кишоварзӣ вусъат меёбад

Душанбе, 2 ноябр. (АМИТ «Ховар», Фирӯза Давлатова). – Сиёсати пешгирифтаи Ҳукумати Ҷумҳурии Тоҷикистон дар самти соҳаи кишоварзӣ, бахусус ислоҳоти он ботадриҷ амалӣ мегардад. Ҷалби сармояи хориҷӣ дар ин раванд ба вусъати ҳадафи мазкур то андозае мусоидат мекунад. Дар ҳамин радиф чанд рӯз қабл ҳайати намояндагони Бонки Ҷаҳонӣ бо сафари корӣ ба ҷумҳурӣ омаданд. Тавре ки аз ҷараёни вохӯрӣ бо роҳбарият ва кормандони Муассисаи давлатии «Маркази идораи лоиҳаҳо оид ба ҳалли қарзҳои хоҷагиҳои пахтакор ва рушди устувори соҳаи пахтакорӣ» маълум гашт, ҳадафи асосии ташрифи меҳмонон қабл аз ҳама аз тачлил ва баҳодиҳии лоиҳаҳои соҳаи кишоварзӣ: “Барқарорсозии соҳаи пахтакорӣ”, “Лоиҳаи таъҷилии таъмини амнияти озуқаворӣ ва воридоти тухмӣ”, ”Рушди гуруҳҳои ҷамоавӣ бо мақсади беҳсозии дастрасӣ ба тухмиҳои хушсифат”, ки аз ҷониби бонки мазкур маблағгузорӣ мегарданд ва ҳамчунин пешниҳоди лоиҳаи нав иборат мебошад. Мутахассисони Бонки Ҷаҳонӣ дар ҳамбастагӣ бо кормандони Муассисаи давлатии «Маркази идораи лоиҳаҳо оид ба ҳалли қарзҳои хоҷагиҳои пахтакор ва рушди устувори соҳаи пахтакорӣ» ба чанд навоҳии вилояти Хатлон сафар карда, бо роҳбарону кормандони ташкилотҳои ҷамъиятӣ, хоҷагии деҳқонӣ ҳамсӯҳбат гашта, аз қитъаҳои намоишӣ, марказҳои омӯзишию машваратӣ, бошишгоҳҳои техникаю олотҳои кишоварзӣ, анборҳои нуриҳои минералӣ ва заҳрхимикатҳо, дидан кардаанд. Ҳамчунин вохӯрии ҳайати намояндагон бо муовини Сарвазири Ҷумҳурии Тоҷикистон, вазоратҳои дахлдор, бонкҳои тиҷоратии ҶСК «Агроинвестбонк» ва ҶСК «Тоҷиксодиротбонк» дар назар аст. Роҳбари ҳайат, иқтисодчии пешбар оид ба соҳаи кишоварзӣ Николаса Ауссуси татбиқи лоиҳаҳои марбути соҳаи кишоварзиро дар Ҷумҳурии Тоҷикистон, ки аз ҷаниби Бонки Ҷаҳонӣ маблағгузорӣ мегарданд, қаноатбахш баҳогузорӣ намуда, афзуд, ки соли оянда баъди ба итмом расидани лоиҳаи “Барқарорсозии соҳаи пахтакорӣ”татбиқи лоиҳаи нав — “Рушди рақобатпазирӣ дар соҳаи кишоварзӣ” дар ҳаҷми беш аз 11 миллион доллари амрикоӣ оғоз мегардад.