Нақши калидии парлумонҳо дар тавсеаи муносибот

Душанбе, 23 ноябр.(АМИТ «Ховар», Марзия Саидова).- «Парлумонҳои ду кишвар дар таҳкими робитаҳои байниҳамдигарӣ нақши калидӣ мебозанд». Ин матлабро Шукурҷон Зуҳуров- раиси Маҷлиси намояндагони Маҷлиси Олии Ҷумҳурии Тоҷикистон дар ҷараёни мулоқоташ бо Нурлан Нигматулин –раиси палатаи поёнии парлумони Қазоқистон иброз дошт. Котиби матбуотии палатаи поёнии парлумони Тоҷикистон Муҳаммадато Султонов аз шаҳри Санкт-Петербурги Русия ба АМИТ «Ховар» иттилоъ дод, ки мусоҳибон масоили тақвияти ҳамкориҳои байнипарлумонӣ миёни Маҷлиси намояндагони Тоҷикистон ва палатаи поёнии парлумони Қазоқистон, фаъол намудани кори гурӯҳҳои дӯстии парлумонӣ, густариши муносибот дар заминаҳои иқтисод, тиҷорат, энергетика, сармоягузорӣ, захираҳои обӣ, кишоварзӣ, фарҳанг, варзишу туризм ва дигар соҳаҳои мавриди назарро матраҳ намуданд. Шукурҷон Зуҳуров таъкид кард, ки байни парлумонҳои Тоҷикистону Қазоқистон имконоти фаровон ҷиҳати тавсеаи равобити байнипалумонӣ вуҷуд дорад. Ба роҳ мондани табодули ҳайатҳои байнипарлумонии Тоҷикистону Қазоқистон ба боз ҳам густариш ёфтани ин муносибот мусоидат менамояд, ҳамчунин дар самти истифодаи таҷрибаи ҳамдигар ҷиҳати таҳия ва омода намудани қонун ва дигар санадҳо кӯмак хоҳад кард. Мавсуф таъкид кард, ки тақвияти ҳамкориҳои байнипарлумонӣ миёни палатаҳои поёнии парлумони ҳар ду кишвар шароити боз ҳам муносиберо дар раванди густариши ин муносибот фароҳам хоҳад овард. Раиси палатаи поёнии парлумони Қазоқистон Нурлан Нигматулин дар мулоқот хостори густариши ҳарчи бештари ҳамкориҳои байнипарлумонии кишвараш бо парлумони Тоҷикистон гардид. Вай гуфт, ки яке аз ҳадафҳои асосии вохўрии роҳбарони парлумонҳои Тоҷикистону Қазоқистон баррасии масъалаи тақвияти ҳамкориҳо дар тамоми заминаҳо ба шумор меравад. Мусоҳибон ҳамзамон доир ба авзои минтақа, бахусус вазъияти Афғонистон табодули назар карданд.