Ғолибони озмунҳои нухбагони соҳибкории Тоҷикистон

Душанбе, 24 декабр. (АМИТ «Ховар», Марҳабо Зунунова ). – Дар маросими ботантана, ки шоми рӯзи ҷумъаи гузашта дар маркази «Душанбе – Плаза» — и пойтахт баргузор гардид, ғолибони озмунҳои «Нухбагони соҳибкории Тоҷикистон» ва «Менеҷерҳои Тоҷикистон» эълон шуданд. Дар ин маросим соҳибкорони маъруфи кишвар, роҳбарони бархе сохторҳои давлатӣ, олимони иқтисоддон ва намояндагони васоити ахбори омма ширкат доштанд.Баъди маросими расмӣ ғолибони озмунҳо таҳти навои дилписанди гурӯҳи машҳури эстрадии «Шамс» бо диплому армуғонҳои вазорату идораҳои кишвар ва созмонҳои байналмилалӣ қадр карда шуданд. Дар анҷоми маросим раиси Анҷумани миллии менеҷеру маркетингшиносон Шавкат Бозоров аҳамияти роҳандозии озмунҳоро барои рушди соҳибкорӣ дар Тоҷикистон зикр карда, изҳори умедворӣ намуд, ки чунин чорабиниҳо ҳар сол рӯи кор оварда хоҳанд шуд. Хотирнишон месозем, ки озмунҳои зикршуда бо ибтикори Вазорати рушди иқтисод ва савдо, Кумитаи давлатии сармоягузорӣ ва идораи амволи давлатӣ, Палатаи савдо ва саноати ҶТ ва Шӯрои ҳамгироии анҷуманҳои тоҷирон ва иттиҳодияҳои ҷамъиятии Тоҷикистон роҳандозӣ шудаанд.