Дар Аличӯл хонаҳо гарманд

Хоруғ, 24 декабр. (АМИТ «Ховар», Л.Додо). – Ҷамоати деҳоти Аличӯли ноҳияи Мурғоб яке аз мавзеъҳои сардтарини вилоят ба шумор меравад. Аз ин рӯ, мақомоти маҳаллии ҳокимияти давлатии ноҳия соли ҷорӣ муассисаҳои таълимию тиббии ин ноҳияро сари вақт бо маводи сӯхт пурра таъмин намуд. Ба гуфтаи раиси ҷамоат С. Эгамбердиев имсол таъмини аҳолӣ ва муассисаҳои маорифу тиббӣ бо маводи сӯхт нисбат ба солҳои гузашта беҳтар гардидааст.  Ба ҷамоати деҳот беш аз 280 тонна ангиштсанг интиқол дода шуд. Боғчаҳо низ бо ангиштсанг пурра таъминанд. Кӯдакон ҳамарӯза бо хӯроки гарм таъмин мебошанд. Онҳо дар ин ҷо таълими ибтидоӣ низ мегиранд.