Мулоқоти минтақавии зиддимухаддиротӣ дар Кобул

Душанбе,11декабр.(АМИТ«Ховар», Фарзона Достонзода).- Мулоқоти минтақавии “Таъсири муомилоти ғайриқонунии маводи мухаддир ба ҷомеа ва тӯдаҳо дар Афғонистон ва кишварҳои ҳамсояи он – ҷустуҷӯи роҳҳои иҷтимоии муқобилият ба мушкилоти алоқаманд ба мухаддирот” 10 декабри соли равон дар шаҳри Кобул – пойтахти Ҷумҳурии Исломии Афғонистон ба кор оғоз намуд. Тавре ки сомонаи расмии АНМН ҶТ иттилоъ медиҳад, аз Ҷумҳурии Тоҷикистон дар ин ҳамоиш ҷонишини директори Агентии назорати маводи нашъаовар Бунафша Одинаева ширкат дорад. Ҳадафи ин чорабинӣ баррасии масъалаҳои вобаста ба пешгирии нашъамандӣ, ба ҳам овардани кӯшишҳои давлатҳои минтақа ҷиҳати пешгирӣ аз ҷинояткориҳои вобаста ба муомилоти ғайриқонунии маводи мухаддир мебошад. Мулоқоти минтақавӣ бо кӯшиши Вазорати мубориза бо маводи мухаддири Ҷумҳурии Исломии Афғонистон ва намояндагии Раёсати СММ оид ба маводи мухаддир ва ҷинояткорӣ дар Афғонистон баргузор мегардад.