Таъсиси Комиссияи Суғду Ботканд оид ба муносибатҳои иқтисодӣ ва савдо

Душанбе, 21 декабр. (АМИТ «Ховар», Бекназари Абӯбакр). — Имрӯз дар шаҳри Хуҷанд ҷаласаи аввалини Комиссияи дуҷонибаи вилояти Суғди Ҷумҳурии Тоҷикистон ва вилояти Ботканди Ҷумҳурии Қирғизистон оид ба муносибатҳои иқтисодӣ ва савдо баргузор гашт. Комиссияи мазкур бо мақсади рушди савдои наздисарҳадии ду кишвари ҳамсоя созмон дода шудааст. Дар ҷаласа намояндагони бахши иқтисодии мақомоти иҷроияи ҳокимияти давлатии вилояти Суғд бо роҳбарии муовини раиси вилоят Ҷамшед Норинов ва намояндагони роҳбарияти ноҳияҳои наздисарҳадии вилояти Ботканд бо роҳбарии муовини ваколатдори ҳукумати Ҷумҳурии Қирғизистон дар ин вилоят Саидҷон Эратов иштирок намуданд. Аз хадамоти матбуоти раиси вилояти Суғд ба АМИТ «Ховар» иттилоъ доданд, ки Ҷ. Норинов оид ба дастовардҳои иқтисодии вилоят дар соли равон маълумот дода, гуфт, ки Ҳукумати Ҷумҳурии Тоҷикистон бо фароҳам овардани фазои хуби инвеститсионӣ, додани имтиёзҳо аз андоз ва пардохтҳои гумрукӣ ба соҳибкорон дар ду соли охир зиёда аз 170 корхонаи истеҳсолиро дар вилоят таъсис дода, суръати афзоиши маҷмӯи маҳсулоти истеҳсоли дохилиро 7-8% таъмин намуда, ба рушди мунтазами иқтисодиёти вилоят мусоидат кард. Дар натиҷаи кӯшишҳои пайвастаи Президенти Ҷумҳурии Тоҷикистон Эмомалӣ Раҳмон, пазируфта шудани Ҷумҳурии Тоҷикистон ба узвияти Созмони ҷаҳонии тиҷорат бори дигар рушди бемайлони иқтисоди Ҷумҳурии Тоҷикистонро собит месозад. Саидҷон Эратов аз дӯстии қадимаи халқҳои қирғизу тоҷик ёдовар шуда, ташкили Комиссияи дуҷонибаи вилояти Суғди Ҷумҳурии Тоҷикистон ва вилояти Ботканди Ҷумҳурии Қирғизистон оид ба муносибатҳои иқтисодӣ ва савдоро талаботи имрӯзаи замони муосир шуморид ва ба кори минбаъдаи комиссия комёбӣ таманно намуд.Дар кори комиссия ташкили бозорҳои наздисарҳадӣ, бартараф намудани монеаҳои сунъӣ ҳангоми убури марз, сабук кардани ҳуҷҷатгузориҳо барои тақвияти савдои наздимарзӣ, таъсиси корхонаҳои муштарак, омӯзонидани соҳибкорони хурду миёна мавриди муҳокима қарор гирифт.Ҳамчунин дар ҷаласа аз таъсиси нашрияи байнидавлатии Тоҷикистону Қирғизистон «Дӯстӣ-Достук-Дружба», ки аз дастовардҳои ду вилояти ҳамсоя мавод чоп менамояд, иттилоъ доданд.