Дар Кӯлоб аз музди маош қарздор нестанд

Кӯлоб, 25 январ. (АМИТ «Ховар», Ф.Мадаминов). – Мақомоти иҷроияи ҳокимияти давлатии шаҳри Кӯлоб дар соли 2012 бо мақсади таъмини рушди соҳаҳои гуногуни иқтисодию иҷтимоии шаҳру деҳот корҳои муайянро ба анҷом расонид. Дар натиҷаи тадбирҳои андешидашуда нақшаи қисми даромади буҷа ва пардохти ҳатмӣ 116,8 фоиз иҷро гардид, ба буҷа ба ҷои 27,6 миллион сомонӣ 32 миллион сомонӣ маблағ ворид гардид. Дар соли 2012 – ум 45 фоиз маблағҳои буҷавӣ ба соҳаи маориф ва 24 фоизи он ба соҳаи тандурустӣ равона шуданд. Қарздории музди меҳнат дар соҳаҳо вуҷуд надорад. Соли 2012 музди меҳнати кормандони ҳамаи соҳаҳо дар шаҳру деҳот ба 430 сомонӣ расид, ки нисбат ба соли 2011 – ум 75 сомонию 20 дирам зиёд аст.