Шаҳринав обод мешавад

Шаҳринав, 31 январ. (АМИТ «Ховар», Ҳотам Рабиев).-Дар мавзеи Сариқамиши ноҳияи Шаҳринав пармакунии чоҳ ба зиёда аз 5 ҳазору 513 метр расид,- иттилоъ дод раиси ноҳияи Шаҳринав Исматулло Зайдов зимни нишасти хабарӣ. Тибқи нақша пармакунии чоҳ то моҳи марти соли ҷорӣ бояд ба анҷом расад. Кофтукови кони мазкур тибқи Созишномаи байнидавлатӣ миёни Русия ва Ҷумҳурии Тоҷикистон иҷро мешавад. Раиси ноҳия дар бораи бурду бохти заҳматкашони ноҳия дар соли сипаригардида маълумоти муфассал дод. Ӯ аз ҷумла қайд кард, ки дар давраи сипаригардида 480 тонна нахи пахта, 220 ҳазор дона хишти сохтмонӣ, 6615 метри кубӣ қуму шағал, 397,1 ҳазор қуттии шартӣ консерваҳои мевагӣ ва сабзавотӣ, 20 тонна равғани растанӣ, 12,7 тонна маҳсулоти ширӣ, 7923 тонна орд ва маҳсулоти нонӣ истеҳсол шудааст. Дар ҳудуди ноҳия дар масоҳати 133 гектар боғу токзори нав бунёд шуд, ки иҷрои дурнамо 104 фоизро ташкил медиҳад. Дар ҷараёни нишасти матбуотӣ хабарнигорон аз муовинони раис, кормандони сохторҳои гуногун ҷавобҳои қаноатбахш дарёфт намуданд.