Нахустин ҷаласаи Комиссияи давлатии татбиқи моратория

Душанбе, 29 март. (АМИТ «Ховар», Бекназари Абӯбакр). — 28 марти соли ҷорӣ дар Кумитаи давлатии сармоягузорӣ ва идораи амволи давлатии Ҷумҳурии Тоҷикистон ҷаласаи якуми Комиссияи давлатӣ оид ба татбиқи мораторияи санҷишҳои фаъолияти субъектҳои соҳибкорӣ дар соҳаҳои истеҳсолӣ доир гардид. Раиси кумита, раиси Комиссияи давлатии татбиқи мораторияи санҷишҳои фаъолияти субъектҳои соҳибкорӣ дар соҳаҳои истеҳсолӣ Давлаталӣ Саидов дар оғози ҷаласа оид ба санадҳои меъёрию ҳуқуқии соҳаи мораторияи санҷишҳои фаъолияти субъектҳои соҳибкорӣ дар соҳаҳои истеҳсолӣ изҳори назар намуд. Бо мақсади таъмини рушди минбаъдаи соҳибкорӣ дар соҳаҳои истеҳсолӣ, афзун намудани истеҳсоли маҳсулоти дохилӣ ва фароҳам овардани шароити мусоид барои ҷалби сармоягузорӣ Фармони Президенти Ҷумҳурии Тоҷикистон аз 30 сентябри соли 2011 “Дар бораи эълон намудани моратория ба ҳама намуди санҷишҳои субъектҳои фаъолияти соҳибкорӣ дар соҳаҳои истеҳсолӣ” ба тасвиб расид.Мувофиқи фармони мазкур ба ҳама намуди санҷишҳои субъектҳои фаъолияти соҳибкорӣ, ки корхонаҳои нави истеҳсоли молу маҳсулот таъсис медиҳанд ва ё техникаю технологияҳои навинро барои васеъ намудани на кам аз нисфи истеҳсолот ҷалб менамоянд ба муҳлати се сол моратория эълон гардид. Дар асоси Фармони мазкур Қонуни Ҷумҳурии Тоҷикистон аз 3 июли соли 2012 “Дар бораи мораторияи санҷишҳои фаъолияти субъектҳои соҳибкорӣ дар соҳаҳои истеҳсолӣ” қабул шуда, ҷиҳати татбиқи Қонун бо қарори Ҳукумати Ҷумҳурии Тоҷикистон аз 2 марти соли 2013 Комиссияи давлатӣ оид ба татбиқи мораторияи санҷишҳои фаъолияти субъектҳои соҳибкорӣ дар соҳаҳои истеҳсолӣ таъсис дода шуд. Дар ҷаласа номгӯи ҳуҷҷатҳое, ки бо мақсади гирифтани шаҳодатномаи субъекти соҳибкорӣ дар соҳаи истеҳсолӣ ба Комиссияи давлатии татбиқи мораторияи санҷишҳои фаъолияти субъектҳои соҳибкорӣ дар соҳаҳои истеҳсолӣ аз ҷониби субъектҳои соҳибкорӣ пешниҳод мешаванд, тасдиқ ва котиби масъули Комиссияи номбурда интихоб шуд.