Беҳдошти тансиҳатии модару фарзанд дар Рашт

Душанбе, 10 апрел. (АМИТ «Ховар»). – Бонки рушди Осиё ва Ҳукумати Тоҷикистон дар шаҳри Душанбе созишномаи лоиҳаеро имзо намуданд, ки дастрасии аҳолии деҳоти қисми шарқии Тоҷикистонро ба хидматрасонии тиббӣ беҳтар месозад. Маблағи умумии созишнома ду миллиону 900 ҳазор долларро ташкил дода, лоиҳаи он то соли 2016 дар амал татбиқ мешавад. Лоиҳа имкон медиҳад, ки пули 66 метраи дарёи Сарбоғи ноҳияи Рашт барқарор намуда, 18 километр роҳе, ки панҷ ҷамоати шаҳри Навободро маркази ноҳияи Рашт пайваст мекунад, таъмир карда шавад.Дар ҳошияи лоиҳа афзун намудани қудрати марказҳои тансиҳатии деҳот пешбинӣ шудааст. Татбиқи лоиҳаро Вазорати нақлиёт ба ӯҳда дошта, фаъолиятро барои роҳандозии он Вазорати тандурустӣ ва Агентии ҳамкории байналмилалии Ҷопон таҳти назорат қарор медиҳанд.