Курси омӯзишӣ барои кормандони полиси афғон

Душанбе, 3 май.(АМИТ «Ховар»).- Дар Маркази миллии таълимӣ оид ба кинологӣ бо ташаббуси Агентии назорати маводи нашъаовари назди Президенти Ҷумҳурии Тоҷикистон (АНМН) ва бо дастгирии Сафорати Британияи Кабир ва Ирландияи Шимолӣ дар ҶТ аввалин курси омӯзишӣ барои кормандони мақомоти зиддимухаддиротии ҶИА кори худро оғоз намуд.Бо мақсади такмили ихтисоси кормандони полиси афғон, дар доираи аҳдҳои басташудаи байни АНМН ва Агентӣ оид ба ҷинояткории муташаккили Британияи Кабир (SOCA), 1 майи соли 2013 ҳайати кормандони полиси афғон иборат аз 13 нафар ба Душанбе омад. 2 май дар марказ маросими кушоиши курси таълимӣ баргузор гардид.Муовини аввали директори АНМН Вайсиддин Азаматов омодагии агентиро дар дастгирӣ ва татбиқи лоиҳаҳо ва барномаҳои такмили ихтисоси мутахассисони мақомоти ҳифзи ҳуқуқи идораҳои ватанӣ ва ҳам кормандони зиддимухаддиротии хориҷӣ зикр намуд. В. Азаматов аҳамияти гузаронидани чунин курсҳоро барои беҳтар намудани натиҷаи мубориза алайҳи маводи мухаддир дар Афғонистон зикр намуд ва умедвории худро оид ба тақвияти минбаъдаи ҳамкорӣ дар соҳаи мубориза бар зидди маводи мухаддир изҳор намуд.Тренинг аз ҷониби мутахассисони SOCA гузаронида хоҳад шуд. Машғулиятҳо аз масъалаҳои мубориза бо фурӯши маводи мухаддир, банақшагирӣ ва гузаронидани тафтишот ва чорабиниҳои фаврие, ки ба гардиши ғайриқонунии маводи мухаддир алоқаманданд, инчунин аз машғулиятҳои амалӣ иборат мебошанд.