Насби таҷҳизоти нав дар «Нассоҷи Хуҷанд»

Душанбе, 12 июн. (АМИТ «Ховар», Фарзона Достонзода). — Дар ҶСК «Нассоҷи Хуҷанд» таҷҳизоти нави ҷопониву итолёвӣ, ки ба маблағи беш аз 30 миллион сомонӣ харидорӣ шудааст, пурра насб карда шуд. Ин корхонаи ресандагӣ дорои дастгоҳҳои шонакунӣ, ҳаллоҷӣ, пилтаресиву ресандагӣ буда, дар он 300 нафар сокинони маҳаллӣ ба кор ҷалб карда шудаанд.Миқдори солонаи риштаи истеҳсолшаванда дар ин корхона 2 ҳазору 500- 3 ҳазор тонро ташкил мекунад.Аз хадамоти матбуоти раиси вилояти Суғд ба АМИТ «Ховар» иттилоъ доданд, ки раиси вилоят Қоҳир Расулзода 11 июн бо кори таҷҳизоти нав шинос шуда, барои таъсиси ҷойҳои кории нав, зиёд намудани ҳаҷми истеҳсол, ба бозори дохиливу хориҷӣ баровардани молҳои истеҳсолшаванда тавсияҳои муфид дод.Раиси вилоят ҳамчунин аз коргоҳи либосдӯзӣ дидан кард. Дар ин коргоҳ 100 нафар занон бо кор машғуланд. Дар инҷо либосҳои мактабиву ҳарбӣ ва либосҳои маъмулӣ аз риштаи омодакардаи корхонаи “Нассоҷи Хуҷанд” бо сифати баланд истеҳсол мешавад. Миқдори умумии истеҳсоли либос дар ин коргоҳ дар як сол 200 ҳазор дона буда, он барои фурӯш дар бозори дохилӣ пешбинӣ шудааст.