Ҷонибдории 8 қонуни наву мукаммал аз сӯи ММ МО ҶТ

Душанбе, 5 июл.(АМИТ «Ховар», Марзия Саидова).- Дар иҷлосияи чордаҳуми палатаи болоии Парлумони мамлакат, ки таҳти раёсати Маҳмадсаид Убайдуллоев-раиси Маҷлиси миллии Маҷлиси Олии ҷумҳурӣ доир гардид, беш аз 50 масъалаи фарогири рушди соҳаҳои ҳаёти сиёсию иқтисодӣ ва иҷтимоию фарҳангии кишвар матраҳ шуд. Аъзои Маҷлиси миллӣ зимни баррасии масъалаҳо бо хулоса аз гузоришҳои раисони Кумитаҳои марбутаи палатаи болоии Парлумони мамлакат Бахтиёр Худоёров, Саймурод Тағоев, Давлатшо Гулмаҳмадов, Убайдулло Қурбонов ва Мамадшо Илолов, ворид намудани тағйиру иловаҳо ба як қатор Қонунҳои Ҷумҳурии Тоҷикистон, ки бо мақсади такмилу мукаммалгардонӣ ва мутобиқсозии ҳар кадоми онҳо ба санадҳои меъёрии ҳуқуқии дар Ҷумҳурии Тоҷикистон амалкунанда, ки аз ҷониби субъектҳои ҳуқуқи ташаббуси қонунгузорӣ таҳия гардидаанд ҷонибдорӣ намуданд. Аз ҷумла, аъзои Маҷлиси миллӣ 8 қонуни наву мукаммали Ҷумҳурии Тоҷикистон — «Дар бораи кооперативҳо», «Дар бораи гаравхона (ломбард)», «Дар бораи фаъолияти аудиторӣ», «Дар бораи хоҷагидорӣ ва истеҳсолоти биологӣ», «Дар бораи муомилот бо партовҳои радиоактивӣ», «Дар бораи минтақаҳои куҳии Ҷумҳурии Тоҷикистон», «Дар бораи маориф» ва Кодекси мурофиаи ҳуқуқвайронкунии маъмурии Ҷумҳурии Тоҷикистонро ҷонибдорӣ карданд. Маврии зикр аст, ки қонунҳои зикргардида қаблан аз ҷониби вакилони палатаи поёнии Парлумони Тоҷикистон-Маҷлиси намояндагон баррасӣ ва қабул шуда, ҷиҳати ҷонибдорӣ ба Маҷлиси миллӣ пешниҳод гардидаанд.