Бузургдошти академики барҷаста

Душанбе, 26 октябр. (АМИТ “Ховар”, Раъно Нусратуллоева).-Дар Донишгоҳи давлатии омӯзгории Тоҷикистон ба номи Садриддин Айнӣ дирӯз, 25-уми октябр бахшида ба 90-солагии академики Академияи илмҳои педагогии ИҶШС, доктори илмҳои педагогӣ, профессор, олими барҷаста Иброҳим Обидов таҳти унвони «Самтҳои асосӣ ва раҳёфти навин дар таҳқиқи масъалаҳои педагогӣ ва низоми таҳсилоти муосир» конфронси илмию назариявии ҷумҳуриявӣ баргузор гардид, ки дар он олимони намоёни мамлакат ширкат варзиданд.Тавре ки котиби матбуотии донишгоҳ Бахтиёри Абдураҳим иттилоъ дод, дар ҳамоиш ректори донишгоҳ Абдуҷаббор Раҳмонов перомуни зиндагӣ ва фаъолияти ин донишманди соҳаи педагогика изҳори андеша кард. Мавсуф таъкид дошт, ки хидматҳои И.Обидов барои илми тоҷик ниҳоят зиёд буда, шоистаи қадршиносӣ мебошанд. Маҳз бо ибтикори ӯ моҳи октябри соли 1979 дар назди Донишгоҳи омӯзгорӣ Шӯрои диссертатсионӣ барои дарёфти унвони илмии номзади илмҳои педагогика ва аз соли 1995 Шӯрои диссертатсионӣ барои дарёфти унвони доктори илмҳои педагогӣ таъсис ёфт ва ҳамзамон, И.Обидов тӯли солиёни зиёд раисии ин шӯроҳоро бар зимма дошт. Зери роҳбарии ин олими варзида 127 нафар рисолаҳои номзадӣ ва доктории хешро дифоъ намудаанд.А.Раҳмонов ҳамчунин зикр кард, ки И.Обидов барои хидматҳои шоён дар назди давлат бо 3 орден, 26 медал ва 36 ифтихорнома сарфароз шуда, унвони фахрии «Ходими шоистаи илми Ҷумҳурии Тоҷикистон»-ро соҳиб буд.Дар ҷамъомад шогирдону ҳамкорони марҳум Иброҳим Обидов аз замони ҳамкорӣ бо ӯ хотироти рангини хешро қисса карданд.