Насби трансформаторҳои иловагӣ дар деҳаҳои Кӯлоб

Кӯлоб, 10 октябр. (АМИТ «Ховар», С. Холов).- Бо мақсади  омода намудани  соҳаҳои иқтисодиёт  ва иҷтимоиёт  ба давраи тирамоҳу зимистони солҳои 2013-2014  шабакаҳои барқи  минтақаи Кӯлоб  12 номгӯй чорабиниҳоро  ба нақша гирифтаанд,  ки  4 адади он иҷро гардидааст. Ба иттилои директори  шабакаҳои барқи минтақаи Кӯлоб Мирзо Исмоилов   иваз намудани  ҷудокунак ва  васлкунакҳои  автоматии  ростпайванди 0,4 кв ба миқдори 295 адад иҷро шуда,  барои ба меъёр овардани  равғани трансформаторҳои  қуввагӣ  2,6 тонна  равғани трансформатор  илова карда шудааст. 
Инчунин  дар 9 деҳаи  ноҳияҳои минтақа  трансформаторҳои  иловагӣ насб гардидааст, ки  иқтидори умумии  онҳо 1633 кв –ро  дар бар мегирад. Гуфта мешавад масъулини  шабакаҳои барқи минтақа  тасмим гирифтаанд, ки назорати қатъиро дар ин самт ба роҳ монда, мушкилоти аҳолиро аз маҳдудияти  барқ  бартараф созанд.