Таъмири майдони машқи шаҳри Кӯлоб

Душанбе, 8 октябр. (АМИТ «Ховар», Л. Қосимова). — Ба наздикӣ дар шаҳри Кӯлоб майдони машқи мошинронии мактаби муттаҳидаи техникии Ташкилоти ҷамъияти мададгори мудофиаи шаҳри Кӯлоб баъди таъмиру таҷдид ба истифода дода мешавад. Он ҳанӯз замони Шӯравӣ сохта шуда, солҳои 90-ум бар асари ҳодисаҳои маълум вайрону валангор гардида буд. Чанде пеш корҳои таъмирию барқароркунӣ дар ин машқгоҳ шуруъ шуда, он ба меъёрҳои таълимию техникии омодасозии мутахассисон барои қувваҳои мусаллаҳ ва хоҷагии халқи ҷумҳурӣ мутобиқ карда мешавад. Дар корҳои ободонии ин машқгоҳ созмонҳои мудофиавии шаҳру ноҳияҳои Ховалинг, Шӯрообод, Ҳамадонӣ, Темурмалик, Данғара, Фархор, Кӯлобу Восеъ саҳмгузорӣ мекунанд. Пас аз таъмиру таҷдид ва мавриди истифода қарор гирифтан ин машқгоҳ пурра ба талаботи ҷаҳони муосир ҷавобгӯ гардида, дар минтақаи Кӯлоб ягона хоҳад буд.  Инчунин ТҶММ тасмим гирифтааст майдони машқи мошинронии шаҳри Қӯрғонтеппаро низ мавриди пайгиру таъмир қарор диҳад. Дар ин бора ба АМИТ «Ховар» аз хадамоти матбуотии ТҶММ хабар доданд.