«Шири куҳистон» ба кор оғоз кард

Хоруғ, 11 декабр.( АМИТ «Ховар», Файз Мирасан).- Ҷамъияти дорои масъулияти маҳдуди «Шири куҳистон» бори нахуст дар шаҳри Хоруғ корхонаи истеҳсоли маҳсулоти шириро ба кор андохт. Директори ин ҷамъият Далер Субҳонкулов гуфт, ки корхона ҳам барои сокинони шаҳр ва ҳам деҳоти навоҳии вилоят хеле муфид аст, зеро акнун соҳибони молу чорво имкон доранд бидуни саргардонӣ маҳсулоти ширии худро ба корхона супурда, дар ивази он ҳаққи кофӣ ба даст оранд. Илова бар ин 15 нафар сокини шаҳр соҳиби шуғли доимӣ гардиданд. Корхона дар як шабонарӯз то як тонна ширро коркард карда, аз он навъҳои гуногуни маҳсулот, ба мисли қаймоқ, ҷурғот, йогурт, творог ва ширро тайёр мекунад ва субҳи барвақт дар мағозаву бозорҳои шаҳр ба фурӯш мебарорад. Нархи маҳсулот нисбат ба дигар дӯкону мағозаҳо арзонтар аст. Аз истеҳсоли зарфи плостикӣ сар карда, то ташхиси пурраи маҳсулот ҳама дар як ҷо ба роҳ монда мешавад, ки ин назорати пурра ва сарфаи вақтро таъмин менамояд.Ба гуфтаи Далер Субҳонкулов онҳо ният доранд боз ду нуқтаи фурӯши маҳсулоти корхонаи худро дар шаҳраки навбунёди ҷамоати Поршневи ноҳияи Шуғнон ва маркази маъмурии ноҳияи Рӯшон фаъол гардонанд.