Ғамхорӣ дар ҳаққи парандагон

Муъминобод, 15.02.2014. (АМИТ «Ховар», Сулаймони  Хол).-  Дар  ноҳияҳои Муъминобод,  Ховалинг,  Восеъ ва  шаҳри  Кӯлоб ба  хотири  нигоҳдории  парандагону  ҳайвоноти  ваҳшӣ  кормандони бахшҳои  ҳифзи  муҳити зисти   ноҳияҳо ва хоҷагиҳои  ҷангалу   дигар  хоҷагиҳои  деҳқонӣ  дар  ҷойҳои  ҷамъшавии  парандагону  ҳайвоноти  ваҳшӣ  коҳу  беда,  кунҷораю  дон ва дигар  намуди  хӯрокӣ   гузоштанд. Шералӣ  Раҳмонов,  сардори шуъбаи  ҳифзи муҳити  зисти  ноҳияи  Муминобод гуфт, ки дар  ноҳияи  Муъминобод ва  Ховалинг, ки   баландии   барф  дар  баъзе  мавзеъҳо  то  якуним   метрро ташкил  мекунад, ин кор саривақтист.  
Кормандони шуъбаи  ҳифзи  муҳити  зисти  ноҳияи  Восеъ  низ дар  дар  рӯзҳои  сарди  зимистон  дар  мавзеи  селбур  ва  куҳи  Хоҷамуъмин  миқдори   зиёди   дону  кунҷора  гузоштанд.