Бадахшон дар иҷрои нақша пешсаф аст

Душанбе, 14.04.2014. (АМИТ «Ховар», Лайло Тоирӣ).- Шурӯъ аз аввали моҳи апрел дар кишвар даъвати навбатии ҷавонон ба сафи Қувваҳои мусаллаҳ оғоз гардид. 
Ин аст, ки аз 1-уми апрели соли равон ҳамаи раисони шаҳру ноҳияҳо, масъулини бахши ҷавонон, варзиш ва сайёҳӣ, Вазорати тандурустӣ ва ҳифзи иҷтимоии аҳолӣ, ичунин дигар мақомоти масъули соҳа вобаста ба фаъолияти хеш ҷараёни даъватро назорат намуда, мутахассисони соҳаи тандурустӣ ҷавононро аз муоинаи тиббӣ мегузаронанд. Дар маъракаи даъвати имсола нахустин шуда дар ҷумҳурӣ ноҳияи Носири Хусрави вилояти Хатлон ва баъдан ноҳияи Мурғоби Вилояти Мухтори Кӯҳистони Бадахшон аз иҷрои пурраи нақшаи даъвати шаҳрвандон ба хизмати ҳатмии ҳарбӣ гузориш доданд. 
Тибқи иттилои Вазорати мудофиаи ҶТ дар 10 рӯзи ин маъракаи муҳими сиёсӣ иҷрои нақша дар Вилояти Мухтори Кӯҳистони Бадахшон 55% ва ин нишондод дар вилояти Суғд беш аз 30%-ро ташкил дод. Дар ин замина вазъи даъвати шаҳрвандон ба хизмати ҳарбӣ дар вилояти Хатлон 53%, дар комиссариатҳои ҳарбии ноҳияҳои тобеи марказ 44% ва дар чаҳор навоҳи пойтахт он ба 33% баробар мебошад. Умуман аз оғози ин маъраки муҳими сиёсӣ иҷрои нақшаи даъвати шаҳрвандон ба хизмати ҳарбӣ дар ҷумҳурӣ зиёда аз 40% -ро дар бар мегирад.