Беҳтарин комиссияҳои ҷамъиятии танзим кадомҳоянд?

Душанбе, 11.06.2014. (АМИТ «Ховар», Мавҷуда Анварӣ). — Ҳафтаи гузашта ҳайати Кумитаи оид ба корҳои дин, танзими анъана ва ҷашну маросимҳои миллӣ ба ноҳияи Рашт сафар намуданд. Аз маркази матбуоти Кумитаи мазкур ба АМИТ «Ховар» иттилоъ доданд, ки гуруҳи корӣ дар семинар-машварат, ки ба 7-умин солгарди қабули Қонуни Ҷумҳурии Тоҷикистон “Дар бораи танзими анъана ва ҷашну маросимҳо дар Ҷумҳурии Тоҷикистон” бахшида шуда буд, иштирок намуда, дар ҷараёни он озмуни “Беҳтарин комиссиияҳои доимӣ ва ҷамъиятӣ”-ро натиҷагирӣ ва ҷамъбаст намуданд. Аз рӯи натиҷаи озмун раиси Кумита Абдураҳим Холиқзода ба намояндагони комиссияҳои доимии шаҳри Ваҳдат, ноҳияҳои Ашт ва Шаҳритус, комиссияи ҷамъиятии Маркази саломатии №5-и шаҳри Душанбе, Раёсати минтақавии хадамоти гумрук дар ВМКБ ва маҳаллаи Телмани ноҳияи Исмоили Сомонии шаҳри Душанбе туҳфаҳои арзишманд тақдим намуд. Ба мудирони бахшҳои оид ба корҳои дин, танзими анъана ва ҷашну маросимҳои миллии 6 ноҳияи водии Рашт як ададӣ компютер, принтер ва дигар таҷҳизоти лозима тақдим гардид.