Баъзе маҳаллаҳои аҳолинишини кишвар тағйири ном мекунанд

Душанбе, 17.07.2014.(АМИТ «Ховар», Марзия Саидзода).-Шоми 16 июл дар Душанбе таҳти раёсати Маҳмадсаид Убайдуллоев-раиси Маҷлиси миллии Маҷлиси Олии Ҷумҳурии Тоҷикистон ҷаласаи Шӯрои палатаи болоии Парлумони мамлакат доир гардид. Аъзои Шӯрои Маҷлиси миллӣ 52 масъалаи марбут ба ворид намудани тағйиру иловаҳо ба як зумра Қонунҳои Ҷумҳурии Тоҷикистон, ки бо мақсади такмилу мукаммалгардонӣ ва мутобиқсозии онҳо ба санадҳои меъёрии ҳуқуқии Ҷумҳурии Тоҷикистон, ки аз сӯи субъектҳои ҳуқуқи ташаббуси қонунгузорӣ таҳия гардидаанд, мавриди баррасӣ қарор доданд. Аз ҷумла, аъзои Шӯро 10 қонуни наву мукаммали Ҷумҳурии Тоҷикистон, аз қабили Қонунҳои конститутсионии Ҷумҳурии Тоҷикистон «Дар бораи судҳои Ҷумҳурии Тоҷикистон», «Дар бораи Суди конститутсионии Ҷумҳурии Тоҷикистон», Қонунҳои Ҷумҳурии Тоҷикистон «Дар бораи сирри давлатӣ», «Дар бораи муқовимат ба савдои одамон ва расонидани кӯмак ба қурбониёни савдои одамон», «Дар бораи ҳуҷҷатҳои тасдиқкунандаи шахсият», «Дар бораи ҳимоя ва дастгирии давлатии соҳибкорӣ», «Дар бораи фаъолияти бонкии исломӣ», Дар бораи шикор ва хоҷагии шикор», «Дар бораи адабиёти таълимӣ» ва «Дар бораи фаъолияти ратсионализаторӣ» матраҳ намуданд. Ҳамзамон дар ҷаласа лоиҳаи Қарорҳои Маҷлиси миллии Маҷлиси Олии Ҷумҳурии Тоҷикистон дар бораи тағйир додани номи маҳалҳои аҳолинишини баъзе ноҳияҳои вилояти Хатлону ноҳияи Файзобод ва дигар масъалаҳои мавриди таваҷҷӯҳ муҳокима гардиданд. Тамоми масъалҳои баррасишуда ҷиҳати муҳокима ва ҷонибдорӣ ба иҷлосияи ҳаждаҳуми Маҷлиси миллии Маҷлиси Олии Ҷумҳурии Тоҷикистон, ки имрӯз дар Душанбе доир мегардад, пешниҳод гардиданд.