Суғд: 322 нафар тибқи квота донишҷӯ шуд

Душанбе, 21.08.2014. (АМИТ «Ховар», Зарангези Латиф).- Зимни мулоқоти Сарвари давлат Эмомалӣ Раҳмон бо кормандони соҳаи маорифи вилоят таъкид гардид, ки соли равон тавассути квотаи Президентӣ 1144 нафар хатмкунандагони муассисаҳои таҳсилоти миёнаи умумии шаҳру ноҳияҳои вилоят дар озмун иштирок намудаанд.
Аз ин миқдор 322 нафари онҳо ба муассисаҳои таҳсилоти олии касбии кишвар қабул шудаанд.
Ҳамзамон ба масъулини вазоратҳои рушди иқтисод ва савдо, маориф ва илм ва мақомоти иҷроияи маҳаллии ҳокимияти давлатӣ супориш дода шуд, ки банақшагирии квотаро воқеъбинона ва тибқи талаботи шаҳру ноҳияҳо ба роҳ монда, ҷараёни ташкил ва баргузории одилонаи озмун барои дарёфти квотаро таҳти назорати ҷиддӣ қарор диҳанд.