Дастури Президент ба ширкатҳои ҳавонавардии ватанӣ

Душанбе, 3.09.2014.(АМИТ “Ховар” Марзия Саидзода).- Президенти Ҷумҳурии Тоҷикистон Эмомалӣ Раҳмон зимни суханронияш дар маросими ифтитоҳи терминали нави «Фурудгоҳи байналмилалии Душанбе»,Вазорати нақлиёт, ширкатҳои ватании ҳавонавардӣ ва фурудгоҳҳои байналмилалии кишварро вазифадор кард, ки дар баробари навсозӣ ва пурра гардонидани парки ҳавопаймоҳо тавассути лизинг, ҷиҳати афзоиши содироти маҳсулоти кишоварзӣ бо ифтитоҳи хатсайрҳои нав барои парвозҳои мустақим ва транзитӣ тадбирҳои зарурӣ андешанд.  Сарвари давлати Тоҷикистон таъкид кард, ки бобати баромадан аз бунбасти коммуникатсионии боркашонии ҳавоӣ дар самти сохтмони терминали боркашонии ҳавоӣ ҳарчи зудтар чораҷўӣ шавад. Мавриди зикр аст, ки алҳол дар Тоҷикистон 6 ширкати ҳавопаймоии ватанӣ фаъолият дорад, ки аз он 4 ширкат ба мусофиркашонӣ ва 2 ширкат ба боркашонии ҳавоӣ машғул аст. Ҳамзамон дар Тоҷикистон 17 ширкати ҳавопаймоии хориҷӣ фаъолият дошта, парвозҳоро ба самтҳои гуногун тавассути фурудгоҳҳои байналмилалии Тоҷикистон анҷом медиҳанд.