Китобхонаи миллӣ соҳиби «Шоҳҷоиза» гардид

Душанбе, 05.09.2014. (АМИТ «Ховар», Раъно Нусратуллозода).-Озмуни ҷумҳуриявии “Китобдор, китобхона ва китобхонаи шахсии сол”, ки бо ибтикори Вазорати рушди иқтисод ва савдои Ҷумҳурии Тоҷикистон, Муассисаи давлатии “Маркази миллии патенту иттилоот”,  Китобхонаи давлатии патентию техникӣ эълон шуда буд, ҷамъбаст гардид. Дар ин озмун Китобхонаи миллии Тоҷикистон аз рӯи номгӯи “Китобхонаи сол” соҳиби “Шоҳҷоиза”-и Вазорати рушди иқтисод  ва савдои ҶТ гардид. Инчунин барои хизматҳои бисёрсолаи бенуқсон дар соҳаи маориф ва илми ҷумҳурӣ, махсусан дар баланд бардоштани мақоми китоб дар ҷомеа, хизматрасонии китобу китобдорӣ, тарғибу ташвиқи мутолиаи китоб дар байни наврасону ҷавонон, донишҷӯёну устодон, баланд бардоштани тарбияи маънавии шаҳрвандон, ҳифзи нигаҳдории хазинаи гаронбаҳои миллат Китобхонаи миллӣ бо Ифтихорномаи Вазорати маориф ва илми Ҷумҳурии Тоҷикистон сарфароз гардонида шуд.
Шоҳҷоиза ва Ифтихорнома бахшида ба “Рӯзи китоб”, ки ҳамасола 4 сентябр дар саросари ҷумҳурӣ таҷлил мегардад, ба  Китобхонаи миллии Тоҷикистон супорида шуд.