Нахустин истеҳсоли коғаз аз нахи пахта дар Тоҷикистон

Душанбе, 5.09.2014. (АМИТ «Ховар», Бекназари Абӯбакр). — Дар Маҷмааи корхонаҳо, ки имрӯз бо иштироки Сарвари Давлат Эмомалӣ Раҳмон дар шаҳри Душанбе ифтитоҳ гардид, инчунин чопхонаи муосир ба фаъолият шурӯъ намуд, ки метавонад дар рушди саноати полиграфии кишвар саҳми сазовор гузорад.
Чопхона имконият дорад, ки ҳама гуна маҳсулоти чопиро бо нархҳои дастрас ва бо сифати баланди ҷавобгӯ ба меъёрҳои ҷаҳонӣ нашр намуда, дар баробари ин, ҳаҷми истеҳсоли маҳсулоти чопиро афзун намояд.
Бояд гуфт, ки корхона бо назардошти навтарин технологияи воридкардаи худ имконият дорад, ки бори аввал дар кишвари мо истеҳсоли коғазро аз нахи пахта ба роҳ монад.
Бо назардошти ин, Президенти кишвар таъкид намуд, ки ин омил метавонад дар самти истеҳсоли коғази аълосифат, аз ҷумла коғази махсус барои чопи санадҳои гуногун ва коғазҳои қиматнок, инчунин кам кардани арзиши аслии маҳсулот мусоидат намояд.
Ёдовар мешавем, ки дар умум дар маҷмааи ифтитоҳшуда зиёда аз 250 нафар бо ҷойи кори доимӣ таъмин мегардад.