«Ситораи беназир» боғи Камолро навсозӣ мекунад

Душанбе, 5.09.2014. (АМИТ «Ховар», Зарангези Латиф).- Барои дубора таҷдиду навсозӣ намудани боғи фарҳангӣ — фароғатии ба номи Камоли Хуҷандии маркази вилояти Суғд ҳамроҳи мутахассисони ширкати «Ситораи беназир»-и Ҷумҳурии исломии Эрон мутахассисони тоҷик низ фаъолият доранд.
Тибқи иттилои масъулин корҳои таҷдиду барқарорсозӣ дар боғи фарҳангӣ — фароғатии маркази вилоят идома дошта, то имрӯз зиёда аз 7 миллион сомонӣ маблағ аз худ шудааст.
Дар айни замон дар ин мавзеъ корҳои сохтмонии бинои мақбараи Камоли Хуҷандӣ, бетонрезии таҳкурсии Хона — музей, девори атрофи иншоот, васли коммуникатсияи обу ташноб идома дорад.
Корҳои ороишӣ ва пардозгарӣ дар моҳи феврали соли оянда гузаронида шуда, то ҷашни ҷаҳонии Наврӯз таҷдиду навсозии боғи фарҳангӣ — фароғатии ба номи Камоли Хуҷандӣ ба анҷом расонида мешавад. Дар баробари ширкати эронии «Ситораи беназир» 5 ширкати дохилӣ — ҶДММ «Суғдсохтмон-1», ҶДММ «СМС», ҶДММ «Само», ҶДММ «ПССО-2», ҶДММ «Су-5» ба корҳои таъмиру барқарорсозӣ фаро гирифта шуда ва наздик ба 150 нафар сокини маҳаллӣ ба кор ҷалб  шудааст.
Гуфта мешавад, ки барои анҷоми ин корҳо харҷи зиёда аз 30 миллион сомонӣ пешбинӣ шудааст.