Баррасии ҳамкориҳои Тоҷикистону Австрия

Душанбе, 15.10.2014.(АМИТ «Ховар», Мавҷуда Анварӣ).-Вазири корҳои хориҷӣ Сироҷидин Аслов бо Сафири Фавқулода ва Мухтори Ҷумҳурии Австрия дар Ҷумҳурии Тоҷикистон Волфганг Баняй 14 октябри соли 2014 мулоқот намуд.
Тибқи иттилои Вазорати корҳои хориҷии кишвар ҷонибҳо масъалаҳои мубрами ҳамкории Тоҷикистону Австрия дар соҳаҳои иқтисод, тиҷорат, гидроэнергетика ва дигар бахшҳои мавриди таваҷҷуҳи тарафайнро баррасӣ намуданд.
Зимни суҳбат ҳамчунин оид ба ҳамкории ду кишвар дар чаҳорчӯби созмонҳои байналмилалӣ ва мавзӯъҳои мубрами минтақавию байналмилалӣ табодули назари судманд сурат гирифт.  
Сафири Австрия талошҳои Ҷумҳурии Тоҷикистонро ҷиҳати рушду тавсеаи ҳамкориҳои созанда ва мутақобилан судманди ду кишвар баланд арзёбӣ намуд.