Чорабинӣ бахшида ба Рӯзи Парчами миллӣ
Душанбе, 20.11.2014.(АМИТ «Ховар», Рафоати Абдулҳамид).- 24-уми ноябри соли равон дар Гимназияи №53-и ба номи Муҳаббат Маҳмудова чорабинии сиёсӣ- фарҳангӣ бахшида ба ҷашни муқаддаси миллӣ-Парчам ва суруди миллии Ҷумҳурии Тоҷикистон баргузор мегардад.
Дар он устодон ва толибилмони гимназияи мазкур иштирок намуда, доир ба парчам ва ҳифзи он маърӯза менамоянд.
Шакли имрӯзаи Парчами давлатии Ҷумҳурии Тоҷикистон 24-уми ноябри соли 1992 дар Иҷлосияи таърихии шонздаҳуми Шӯрои Олии Ҷумҳурии Тоҷикистон дар қасри Арбоби шаҳри Хуҷанд қабул шудааст. Бо қабули қарор дар бораи Парчами давлатии Ҷумҳурии Тоҷикистон аз тарафи вакилони халқ нахустин бор Парчами Тоҷикистони соҳибистиқлол дар толори ин қаср парафшон гашт.
Соли 2009 бо ташаббуси Президенти мамлакат 24-уми ноябр ҳамчун рӯзи Парчами давлатӣ эълон гардид ва минбаъд ҳамасола ба таври мутантан ин рӯз дар кишвари маҳбубамон ҷашн гирифта мешавад.
Ёдовар мешавем, ки чорабинии мазкур соати 11:00 оғоз меёбад.